Qozog‘istonda yangi davlat instituti shakllanib, Yerlan Karin vitse-prezident lavozimiga tayinlandi
Yangi tahrirdagi Konstitutsiyaga muvofiq joriy etilgan vitse-prezident instituti davlat boshqaruvi tizimini barqarorlashtirish hamda hokimiyat iyerarxiyasida aniqlikni ta’minlashga xizmat qiladi.
Yangi lavozim egasi davlat rahbari nomidan parlament, hukumat va boshqa davlat organlari bilan munosabatlarda vakillik qiladi. Shuningdek, prezident o‘z vakolatlarini muddatidan oldin topshirgan taqdirda, davlatni boshqarish huquqi to‘g‘ridan-to‘g‘ri vitse-prezidentga o‘tishi belgilangan.
Siyosatshunoslik fanlari nomzodi Yerlan Karin mehnat faoliyatini maktabda tarix va geografiya fani o‘qituvchisi sifatida boshlagan. Keyinchalik u Markaziy Osiyo siyosiy tadqiqotlar agentligi va “Qozog‘iston” milliy teleradiokorporatsiyasini boshqargan, shuningdek, hukmron partiya hamda davlat organlarida turli mas’uliyatli lavozimlarni egallab kelgan.
U 2019-yildan beri prezident jamoasida faoliyat yuritib, davlat maslahatchisi, prezident yordamchisi va so‘nggi oylarda Prezident administratsiyasi rahbarining birinchi o‘rinbosari lavozimlarida ishlagan. Qozog‘iston davlat apparatida boy tajribaga ega bo‘lgan Karin yangi tahrirdagi Konstitutsiya loyihasini ishlab chiqish va siyosiy islohotlarni amalga oshirishda ham yetakchi guruh a’zosi sifatida faol qatnashgan.
Ma’lumot uchun, O‘zbekiston siyosiy tarixida ham vitse-prezidentlik lavozimi mavjud bo‘lgan. Ushbu lavozim 1990-yil 24-martda, hali Ittifoq tarqalmasidan oldin, O‘zbekiston SSR Oliy Soveti tomonidan prezidentlik boshqaruvi joriy etilishi bilan bir vaqtda ta’sis etilgan.
O‘zbekiston tarixidagi birinchi va yagona vitse-prezident Shukrullo Mirsaidov bo‘lgan. U bunga qadar Ministrlar soveti raisi lavozimida faoliyat yuritgan va prezident Islom Karimovning o‘rinbosari sifatida davlat boshqaruvida ikkinchi shaxs hisoblangan.
Lekin ushbu institut uzoq yashamadi. 1991-yil oxirida mustaqillik e’lon qilinib, davlat tuzilmasini isloh qilish jarayoni boshlangach, 1992-yil 8-yanvarda vitse-prezidentlik lavozimi rasman tugatildi. Uning o‘rniga ijro etuvchi hokimiyatni boshqarish uchun Bosh vazir lavozimi ta’sis etildi hamda prezidentlik va hukumat boshqaruvi vakolatlari qayta taqsimlandi. Shunday qilib, Shukrullo Mirsaidov mamlakat tarixida ushbu maqomni egallagan yagona siyosatchi bo‘lib qoldi.
