Qorabog‘ni tiklashda birinchi amaliy yordam O‘zbekistondan kelgan – Ilhom Aliyev
Ilhom Aliyevning so‘zlariga ko‘ra, O‘zbekiston tomonidan Fuzuliy shahrida Mirzo Ulug‘bek nomidagi zamonaviy maktab barpo etilib, ikki davlat rahbarlari ishtirokida ochilgan. Keyinchalik mintaqaning boshqa davlatlari ham hissa qo‘shgan bo‘lsa-da, ilk amaliy ko‘mak aynan O‘zbekistondan kelgan. Shuningdek, Xonkendi shahridagi birinchi yirik sanoat korxonasi tikuvchilik fabrikasi ham O‘zbekiston sarmoyasi hisobidan barpo etilgan.
Bugungi kunda ikki mamlakat o‘rtasidagi iqtisodiy va sanoat hamkorligi jadal rivojlanmoqda. Xususan, qiymati 500 million dollar bo‘lgan O‘zbekiston–Ozarbayjon qo‘shma investitsiya jamg‘armasi turli loyihalarni amalga oshirmoqda. Bundan tashqari, Ozarbayjonning SOCAR kompaniyasi O‘zbekistondagi “Qustuq” gaz koniga sarmoya kiritgan va qidiruv-qazish ishlaridan ijobiy natija kutmoqda.
Ozarbayjon yetakchisi Markaziy Osiyo davlatlari bilan hamkorlikning yangi bosqichga chiqishida ham Shavkat Mirziyoyevning o‘rni alohida ekanini ta’kidladi. Hozirda Ozarbayjon va Markaziy Osiyo yagona maslahat formatida ishtirok etmoqda, bu esa transport-logistika va geosiyosiy aloqalarni mustahkamlamoqda. Aliyev bu jarayonda O‘zbekiston Prezidentining uzoqni ko‘ra bilishi va strategik qarashlari muhim rol o‘ynaganini qayd etib, o‘zbek xalqining Shavkat Mirziyoyev rahbarligidagi islohotlari va yutuqlarini yuqori baholadi.
