Qirg‘iziston O‘zbekiston bilan chegara postlarida 27 nafar mansabdor shaxsni qo‘lga oldi
Qirg‘iziston Milliy xavfsizlik davlat qo‘mitasi Botken viloyatida joylashgan “Qadamjoy - avtomobil yo‘li” hamda “Chashma - avtomobil yo‘li” nazorat-o‘tkazish punktlarida keng ko‘lamli tezkor tadbir o‘tkazgan. Operatsiya davomida bojxona, chegara va veterinariya xizmatiga oid jami 27 nafar xodim qo‘lga olingani ma’lum qilingan. Maxsus tadbir kecha, 5-iyul kuni kechqurun amalga oshirilgan bo‘lib, unga Milliy xavfsizlik xizmati xodimlari hamda “Alfa” maxsus bo‘linmasi jalb etilgan.
Gumonlanuvchilar korrupsion holatlarga aloqador ekani taxmin qilinmoqda. Tintuv jarayonlarida ayrim pul mablag‘lari ham aniqlangan. Xususan, Chegara xizmati xodimiga tegishli xizmat avtomashinasidan 38,5 ming qirg‘iz somi, shuningdek 5,4 milliondan ortiq o‘zbek so‘mi hamda qo‘shimcha naqd pullar topilgani aytilmoqda. Bojxona vakillaridan ham xorijiy valyutadagi mablag‘lar musodara qilingan. “Chashma - avtomobil yo‘li” punktida 11 nafar, “Qadamjoy - avtomobil yo‘li” punktida esa 16 nafar xodim ushlangan. Umumiy hisobda 27 kishi Milliy xavfsizlik qo‘mitasining viloyat boshqarmasiga olib ketilgan.
Shuningdek, operatsiya davomida ikki dona AK-74 avtomati, o‘qdonlar va o‘q-dorilar ham ashyoviy dalil sifatida olingan. Ayrim holatlar nazorat-o‘tkazish punktlarida o‘q uzilganini ham o‘z ichiga olgani tekshirilmoqda.
Tadbir vaqtida chegara punktlari orqali transport vositalari va fuqarolar harakati vaqtincha to‘xtatilgan. Keyinchalik punktlar yana ish rejimiga qaytarilgan.
