Qashqadaryoda sel Damasni oqizib ketdi. oqibatda bir kishi halok bo‘ldi
Qashqadaryo viloyati Dehqonobod tumanida kecha, 13-oktabr kuni kuchli sel oqimi Damas avtomobilini oqizib ketdi. oqibatda bir kishi halok bo‘ldi. Bu haqda viloyat FVB xabar berdi.
Ma’lumotlarga ko‘ra, holat soat 17:30 larda tumanning tog‘li hududlarida kuzatilgan qisqa muddatli kuchli yomg‘ir yog‘ishi oqibatida “Qo‘ng‘irot” MFY Shakarbuloq qishlog‘i hududidan sel-suvlari oqimi o‘tgan.
Yo‘ldan adashgan Damas haydovchisi va uning hamrohi yo‘nalishni aniqlash maqsadida sel oqimi o‘tadigan hududda to‘xtagan. Avtomobil sirpanib, sel yo‘lining chuqurroq qismiga tushgan. Shundan so‘ng haydovchi transport vositasidan tushib, telefon orqali bog‘lanishga uringan va hamrohini sel kelayotgani haqida ogohlantirgan.
Biroq sel oqimi oqibatida Damas avtomobil va uning ichidagi yo‘lovchini oqim olib ketgan. Olib borilgan qidiruv-qutqaruv ishlari davomida yo‘lovchi fuqaroning jasadi topilgan.
Hodisa joyiga tuman hokimligi, FVB va IIB mas’ullari jalb etilgan.
Eslatib o‘tamiz avvalroq, O‘zbekistonning 9 ta viloyatida sel-suv toshqinlari yuzaga kelishi haqida xabar berilgan edi.
