Prezident “Toshkent yo‘lbarsi” Rufat Risqiyev oilasiga hamdardlik bildirdi
Davlat rahbari Shavkat Mirziyoyev, parlament va Hukumat mutasaddilari imzolagan ta’ziyanomada xalq orasida “Toshkent yo‘lbarsi” nomi bilan tanilgan buyuk sportchining o‘zbek boks maktabini dunyoga tanitishdagi beqiyos xizmatlari alohida e’tirof etilgan. Ta’kidlanishicha, uning bosib o‘tgan sharafli hayot yo‘li kelajak avlod uchun chinakam ibrat va matonat maktabidir.
Rufat Risqiyev nafaqat ringdagi g‘alabalari, balki keyinchalik sport hakami va murabbiy sifatidagi fidoyiligi bilan ham milliy sport rivojiga ulkan hissa qo‘shgan. U sobiq Ittifoqning 4 karra chempioni, jahon oltin medali sohibi hamda 1976-yilgi Monreal Olimpiadasi kumush sovrindori hisoblanardi. Uning xizmatlari davlatimiz tomonidan “El-yurt hurmati” va “Do‘stlik” ordenlari bilan taqdirlangan edi.
Mamlakat rahbariyati o‘zbek sportining yorqin afsonasi, samimiy va kamtarin inson Rufat Risqiyevning porloq xotirasi xalq va jahon boks jamoatchiligi qalbidan hamisha munosib o‘rin egallab qolishini ta’kidlab, marhumning yaqinlariga chuqur hamdardlik bildirgan.
