Prezident 15 daqiqada bosib o‘tiladigan “Urganch – Xiva” pullik avtomobil yo‘lini sinab ko‘rdi
O‘zbekiston Prezidenti Shavkat Mirziyoyev Xiva shahrida tadbirkorlar bilan o‘tkazilgan ochiq muloqotdan so‘ng yangi “Urganch – Xiva” pullik avtomobil yo‘li bilan tanishdi. Bu haqda Prezident matbuot xizmati xabar berdi.
35 kilometr uzunlikdagi yangi magistral Urganch xalqaro aeroporti va Xiva shahrini bog‘laydi. Yo‘l aholi va sayyohlar uchun xavfsiz, tezkor va qulay transport qatnovini ta’minlashga mo‘ljallangan.
Mavjud yo‘l orqali Urganchdan Xivaga yetib borish uchun 45–50 daqiqa vaqt ketayotgan bo‘lsa, yangi to‘rt tasmali magistral orqali bu masofani 15–17 daqiqada bosib o‘tish mumkin bo‘ladi. Yo‘lning sutkalik o‘tkazuvchanligi 30 mingdan ortiq transport vositasini tashkil etadi.
Loyiha doirasida 35 kilometr avtomobil yo‘li bilan birga yer osti tunneli, 8 ta yo‘l o‘tkazgich, 15 ta ko‘prik va 106 ta suv o‘tkazish inshooti barpo etilgan.
Yo‘lda transport oqimini boshqarish va to‘lovlarni undirish sun’iy intellektga asoslangan raqamli tizimlar orqali amalga oshiriladi. Yengil va yuk avtomobillari hamda avtobuslardan to‘lov transport vositasini to‘xtatmasdan, elektron shaklda undirilishi ko‘zda tutilgan.
Prezident matbuot xizmati ma’lumotiga ko‘ra, yo‘l bo‘yida xalqaro standartlarga mos servis va xizmat ko‘rsatish obyektlari ham tashkil etiladi. Magistral qurilishida issiq iqlim sharoitiga chidamli maxsus modifikatsiyalangan bitum aralashmasidan foydalanilgan. Yo‘l qoplamasining umumiy qalinligi 87 santimetrni tashkil etadi.
Yangi tahrirdagi “Avtomobil yo‘llari to‘g‘risida”gi qonunda pullik avtomobil yo‘llarini tashkil etishning huquqiy asoslari belgilangan. Bunda haydovchilar uchun muqobil bepul yo‘l mavjud bo‘lishi asosiy shart sifatida ko‘rsatilgan.
“Urganch – Xiva” magistrali O‘zbekistondagi pullik avtomobil yo‘llarini rivojlantirish bo‘yicha ilk yirik loyihalardan biri bo‘lib, uning ishga tushirilishi hududdagi transport qatnovini tezlashtirish va Xorazmning turizm infratuzilmasini rivojlantirishga xizmat qilishi kutilmoqda.
Shu bilan Prezident Shavkat Mirziyoyevning Xorazm viloyatiga tashrifi yakunlandi. Davlat rahbari yangi avtomobil yo‘li orqali Urganch aeroportiga yo‘l olgan va Toshkentga jo‘nab ketgan.
