Poytaxtda tez yordamga yo‘l bermagan BYD haydovchisi ushlanib, mashinasi jarima maydonchasiga olindi
Ijtimoiy tarmoqlarda BYD rusumli avtomobil haydovchisi “Tez yordam” mashinasi mikrofon va maxsus signal orqali bir necha bor ogohlantirish berishiga qaramay, yo‘l bermay harakatlangan videosi tarqaldi. Toshkent shahar IIBB YXHX xodimlari tomonidan olib borilgan surishtiruvlar natijasida ushbu haydovchi tezkorlik bilan aniqlandi. U bilan o‘tkazilgan profilaktik suhbat davomida haydovchi mashina ichida musiqa baland qo‘yilgani hamda konditsioner ishlab turgani sababli ogohlantirishlarni eshitmay qolganini ro‘kach qilgan.
Amaldagi Yo‘l harakat qoidalariga ko‘ra, ko‘k yoki qizil chiroqli chiroqcha hamda maxsus audio-signalni yoqqan holda kelayotgan tezkor xizmat avtomobillariga darhol yo‘l bo‘shatish shart. Qoidabuzarlik birinchi marta sodir etilganda Ma’muriy javobgarlik to‘g‘risidagi kodeksning 128-moddasiga asosan BHMning 5 baravari miqdorida jarima solinadi. Bir yil davomida takrorlansa, jarima miqdori keskin oshadi yoki haydovchi haydash huquqidan mahrum etilishi mumkin.
Shuningdek, YHQning 17-moddasiga muvofiq, orqadan kelayotgan “Tez yordam”ga yo‘l bo‘shatish maqsadida majburan chiziqni bosib o‘tish yoki tezlikni oshirish kabi holatlar “oxirgi zarurat” deb baholanadi. Bunda kameralar orqali qayd etilgan jarimalar bekor qilinadi.
