Pashinyan va’dasini bajardi. Armaniston sobiq prezidenti hibsga olindi
Maxsus xizmat xodimlari sobiq davlat rahbari va uning parlamentda deputat bo‘lib turgan o‘g‘li Levon Kocharyanning xonadonlarida tintuv o‘tkazgan. Shu bilan birga, mamlakat bo‘ylab yana bir necha o‘nlab manzillarda tezkor-tergov harakatlari olib borilmoqda. Sobiq prezident idorasi vakillari mazkur hodisani amaldagi hukumatning Kocharyanlar oilasiga nisbatan navbatdagi siyosiy tazyiqi va hujumi sifatida baholagan.
Mazkur keskin harakatlar parlamentdagi shov-shuvli dahanaki jangdan so‘ng darhol boshlandi. Bir kun avval Bosh vazir Nikol Pashinyan va Levon Kocharyan qonunchilik organida bir-birlarini og‘ir jinoyatlarda ayblab, dahshatli dahanaki urush qilgan edi. Shundan so‘ng mahalliy OAVda hukumat rahbari huquq-tartibot idoralariga sobiq prezident oilasiga qarshi keskin choralar ko‘rish topshirig‘ini bergani haqida xabarlar tarqaldi.
“Saylovdan so‘ng Robert Kocharyan hibsga olinishi va 1-mart voqealaridagi jinoyati uchun sud oldida javob berishi kerak”, degan Nikol Pashinyan.
Ma’lumot uchun, iyun oyida Markaziy saylov komissiyasi 1998-2008-yillarda Armanistonni boshqargan Kocharyanni jinoiy javobgarlikka tortishga rozilik bergan. Sobiq davlat rahbariga mansab vakolatini suiiste’mol qilish va pul yuvish bo‘yicha ayblovlar qo‘yilishi kutilmoqda. Shuningdek, Pashinyan ilgari ham 2008-yilgi tinch namoyishchilarning o‘limiga sabab bo‘lgan voqealar uchun Kocharyanni jazolashini bir necha bor ta’kidlagan.
