“Oʻzmetkombinat” Xitoy holdingi bilan 26 mamlakatga yoʻl ochmoqchi
Uchrashuvda tomonlar “Oʻzmetkombinat” mahsulotlarini tashqi bozorlarga yetkazish imkoniyatlarini kengaytirish masalasini batafsil muhokama qildilar. Xususan, eksport geografiyasini kengaytirish, yangi bozorlarga chiqish, logistika yoʻnalishlarini diversifikatsiya qilish hamda qoʻshma investitsiya loyihalarini amalga oshirish boʻyicha fikr almashildi.
Jiangsu SOHO Holdings Group 160 dan ortiq mamlakat va hudud bilan savdo aloqalariga ega. Holding tarkibidagi kompaniyalar Jiangsu orqali oʻtuvchi Xitoy–Yevropa va Xitoy–Osiyo yuk poyezdlarini muvofiqlashtiradi. Ular 26 ta xalqaro temir yoʻl yoʻnalishi orqali 26 mamlakatdagi qariyb 80 ta stansiyani bogʻlaydi.
Bu imkoniyatlar “Oʻzmetkombinat” uchun eksport geografiyasini kengaytirish va logistika yoʻnalishlarini diversifikatsiya qilishda muhim platforma boʻlishi mumkin.
SOHO Holdings Jiangsu provinsiyasining yirik davlat holdinglaridan biri hisoblanadi. Uning tarkibida qariyb 400 ta korxona faoliyat yuritadi. 2025-yilda holdingning import-eksport operatsiyalari hajmi 12,2 milliard dollarga yetgan.
Eslatib o’tamiz, avvalgi xabarlarimizda tashqi savdoning teng yarmi Xitoy va Rossiyaga to‘g‘ri kelganini xabar qilgan edik.
