O‘zbekistonning AQSHdagi elchisi Braziliya prezidentiga ishonch yorliqlarini topshirdi

Muloqot chog‘ida Braziliya prezidenti O‘zbekistonni istiqbolli va ishonchli hamkor deb bilishini hamda munosabatlarni chuqurlashtirishdan manfaatdor ekanini aytdi. Mamlakat rasmiylari BMT va BRIKS maydonlarida Braziliya tashabbuslarini qo‘llab-quvvatlayotgani uchun O‘zbekistonga minnatdorchilik bildirdi.

Erishilgan asosiy kelishuvlarga ko‘ra, svdo-iqtisodiy masalalar bo‘yicha hukumatlararo komissiya tuziladi, ikki tomonlama tijoratda Rio-de-Janeyroda ochilgan O‘zbekistonning birinchi Savdo uyi imkoniyatlaridan keng foydalaniladi. Qolaversa, O‘zbek mineral o‘g‘itlarining Braziliya bozoriga kirishi kengaytiriladi va eksportni soddalashtirilgan tartiblari qo‘llanadi hamda geologiya, oliy ta’lim va sport yo‘nalishlarida hamkorlik faollashtiriladi.

Tashrif davomida elchi Furqat Sidiqov Braziliya tashqi ishlar vaziri Mauru Viyeyra, Taraqqiyot, sanoat, savdo va xizmatlar vazirligi rahbari, prezident maslahatchisi Rojeriu Zerbone, TIV rahbari o‘rinbosari Serjiu Klibank hamda ApexBrasil agentligi prezidenti Jorje Viana bilan uchrashuvlar o‘tkazgan.

Braziliya hukumati ko‘magida mamlakatning yetakchi kompaniyalari bilan muzokaralar o‘tkazish, sarmoyaviy takliflarni ishlab chiqish va o‘zaro tashriflarni tashkil etish bo‘yicha kelishuvga erishilgan.