O‘zbekistonlik shifokor Toshkent-Seul reysida ayolga tibbiy yordam berdi
O‘zbekistonlik shifokor Toshkentdan Seulga uchayotgan samolyot bortida kuchli shok holatiga tushib qolgan ayolni qutqarib qoldi. Bu haqda Janubiy Koreyaning “TJB News” nashri xabar berdi.
Ma’lum qilinishicha, O‘zbekistondan Koreyaga uchayotgan samolyotning ayol yo‘lovchisi to‘satdan kuchli tibbiy shok holatiga tushib qolgan.
Videoni taqdim etgan yo‘lovchining so‘zlariga ko‘ra, o‘sha paytda ayolning diastolik qon bosimi 20 gacha tushib ketgan. Samolyot ekipaji shifokor qidirgan va favqulodda qo‘nish variantini ham ko‘rib chiqqan.
Ayolga Chungbuk universitetida amaliyot o‘tash uchun Koreyaga ketayotgan o‘zbekistonlik Hasan ismli shifokor birinchi tibbiy yordamni ko‘rsatgan.
Qayd etilishicha, ko‘rsatilgan yordam sababli favqulodda qo‘nishga hojat qolmagan va samolyot reja bo‘yicha Koreyaga yetib borgan.
“Men har qanday vaziyatda, har doim sizlarga yordam berishga tayyorman. Bu mening burchimdir”, degan o‘zbekistonlik shifokor o‘ziga bildirilgan minnatdorchiliklarga javoban.
