O’zbekistonlik hamshiralar AQSHga ishga yuborilishi mumkin
Uchrashuvda kompaniyalarning sog’liqni saqlash va ta’lim xizmatlari yo’nalishi hamda “Korn Ferry Health” ning operatsion direktori ishtirok etdi. Muzokara davomida o‘zbekistonlik hamshiralarni AQSh tibbiyot tizimi talablariga muvofiq qo‘shimcha tayyorlash, sertifikatlash va litsenziyalash, ularni Amerika sog‘liqni saqlash muassasalariga tartibli, xavfsiz va o‘zaro manfaatli asosda jalb etish imkoniyatlari mavzusi aytib o’tildi.
AQSh vakillariga O‘zbekistonda tashqi mehnat migratsiyasini tartibga solish, xorijiy ish beruvchilar bilan markazlashgan hamkorlikni rivojlantirish, mutaxassislarni maqsadli tayyorlash va ularning chet eldagi huquqlarini himoya qilish yo‘nalishi haqida batafsil ma’lumot berildi.
Kompaniya vakillari AQSh sog‘liqni saqlash tizimida hamshiralar va yordamchi klinik-texnik mutaxassislarga ehtiyoj yuqori ekanini ta’kidladi. Ular qator tibbiyot muassasalari xalqaro ishchilarni ishga olishga ochiq ekanini, ayniqsa klinik tayyorgarligi yaxshi, ingliz tilini mukammal biladigan va litsenziya talablariga javob beradigan xorijiy mutaxassislarga talab katta ekanini qayd etdi.
“Korn Ferry” rahbariyati O‘zbekistonning tashabbusiga katta qiziqish bildirib, uni AQShdagi tibbiyot tizimlari, ish beruvchilar va hamshiralik ta’limi muassasalari bilan muhokama qilishga tayyorligini ma’lum qildi.
Muzokaralarda salohiyatli ish beruvchilarning aniq kadr ehtiyojlari, talab qilinadigan mutaxassisliklar va nomzodlarga qo‘yiladigan malaka talablarini o‘rganishga kelishildi. Shuningdek, ikki mamlakatdagi hamshiralar tayyorlash tizimlaridagi farqlar — til, klinik tayyorgarlik, malakani tan olish, litsenziyalash va immigratsiya talablari qiyosiy tahlil qilinadi.
Tomonlar loyihani avval kichik pilot guruh bilan boshlab, keyin AQSh ish beruvchilarining talablariga qarab bosqichma-bosqich kengaytirishni maqsadga muvofiq deb hisobladi.
1969-yilda Los-Anjelesda tashkil etilgan “Korn Ferry” bugungi kunda 50 dan ortiq mamlakatda faoliyat yuritadi. Kompaniya tashkilotlarni rivojlantirish, rahbar va mutaxassislarni tanlash, xalqaro kadrlar yollash hamda inson kapitalini boshqarishga ixtisoslashgan.
