O‘zbekistonda to‘qqiz oyda kiberfiribgarlar fuqarolarga 1 trillion so‘mdan ortiq zarar yetkazdi
Oqibatda fuqarolarga 1 trillion so‘mdan ziyod moddiy zarar yetkazilgan bo‘lib, olib borilgan tergov harakatlari davomida shundan 210 milliard so‘mdan ortiq mablag‘ egalariga qaytarilgan.
Kiberjinoyatlarga qarshi kurashish departamenti mas’ullari aholi pulini noqonuniy o‘zlashtirishda asosan to‘rtta aldov usulidan foydalanilayotganini ochiqladi. Jinoyatlarning deyarli yarmi – 50 foizi to‘y taklifnomasi, fotosurat yoki ta’ziya xabari ko‘rinishida yuboriladigan zararli APK fayllar orqali sodir etilmoqda. Shuningdek, soxta havolalar, pulni tez ko‘paytirishni va’da qiluvchi soxta treyderlar hamda o‘zini bank yoki huquqni muhofaza qiluvchi organ xodimi deb tanishtiruvchi shaxslar eng ko‘p uchrayotgan firibgarlik turlaridir.
Soha vakillari kiberhujumlardan himoyalanish uchun yaratilgan "APK Qo‘riqchi" dasturidan foydalanishni hamda shubhali havolalarni ochmaslikni tavsiya etadi. Shu bilan birga, fuqarolar shaxsiy ma’lumotlar, SMS-kodlar va karta rekvizitlarini begona shaxslarga bermasliklari hamda onlayn savdolarda mahsulotni ko‘rmasdan oldindan to‘lov qilmasliklari so‘raladi.
Mablag‘lar noqonuniy yechib olinganda zudlik bilan 102 raqamiga yoki huquqni muhofaza qiluvchi organlarga murojaat qilish zarurligi ta’kidlandi. O‘z vaqtida berilgan tezkor xabar o‘g‘irlangan pullarni zanjir bo‘ylab muzlatish va saqlab qolish imkoniyatini keskin oshiradi.
