O‘zbekistonda sanoat ishlab chiqarishi hajmi 795 trillion so‘mdan oshdi
2026-yilning yanvar–iyul oylarida O‘zbekiston bo‘yicha jami sanoat ishlab chiqarishi hajmi 795,4 trillion so‘mga yetdi. Mamlakat iqtisodiyotining ushbu tarmog‘ida eng yuqori ko‘rsatkich va asosiy ulush ishlab chiqaruvchi sanoat hissasi hisoblanadi. Hisobot davrida ushbu yo‘nalishda 690,7 trillion so‘mlik mahsulot tayyorlanib, umumiy sanoat hajmining 86,8 foizini tashkil etgan.
Shuningdek, tog‘-kon sanoati va ochiq konlarni ishlash yo‘nalishida ishlab chiqarish hajmi 50,2 trillion so‘mga yetdi. Ushbu tarmoqning respublika umumiy sanoat ishlab chiqarishidagi ulushi 6,3 foiz darajasida qayd etildi.
Boshqa tarmoqlar kesimida olganda, elektr, gaz, bug‘ bilan ta’minlash hamda havoni konditsiyalash sohasida 50,4 trillion so‘mlik (umumiy ulushning 6,4 foizi) ko‘rsatkichga erishilgan. Suv ta’minoti, kanalizatsiya, chiqindilarni yig‘ish va utilizatsiya qilish yo‘nalishida esa 4,1 trillion so‘mlik xizmat hamda mahsulotlar yaratilib, ularning sanoatdagi ulushi 0,5 foizni tashkil etdi.
