O‘zbekistonda islom obligatsiyalari muomalaga kiritiladi
Oliy Majlis Qonunchilik palatasining 28-iyul kungi majlisida “Kapital bozori to‘g‘risida”gi qonun loyihasi birinchi o‘qishda qabul qilindi. Hujjatdagi eng muhim yangiliklardan biri sifatida O‘zbekistonda sukuk — islom obligatsiyalarini muomalaga kiritish nazarda tutilmoqda.
Ta’kidlanadiki, qonun loyihasining asosiy maqsadi mamlakat kapital bozorini xalqaro standartlar asosida rivojlantirish, investorlar uchun zamonaviy moliyaviy vositalarni joriy etish hamda investitsiya muhitini yanada yaxshilashdan iborat.
Loyihaga ko‘ra, kapital bozorida sukuk bilan bir qatorda barqaror rivojlanish obligatsiyalari, qoplangan obligatsiyalar va sekyuritizatsiyalangan obligatsiyalar ham muomalaga kiritiladi.
Xususan, sukukning joriy etilishi islom moliyasi tamoyillariga amal qiluvchi investorlar uchun yangi investitsiya imkoniyatlarini yaratishi hamda ushbu yo‘nalishdagi kapitalni jalb etishga xizmat qilishi kutilmoqda.
Muhokamalar davomida deputatlar investorlarni jalb qilish, korporativ boshqaruv sifatini oshirish va emitentlar tomonidan axborotlarni ochiq-oshkora e’lon qilish talablarini kuchaytirish masalalariga alohida e’tibor qaratdi. Shuningdek, kapital bozorini tartibga soluvchi organning vakolatlarini Qimmatli qog‘ozlar komissiyalari bo‘yicha xalqaro tashkilot (IOSCO) tamoyillariga muvofiqlashtirish, Markaziy depozitariy hamda reyting agentliklari faoliyatini takomillashtirish zarurligi qayd etildi.
.jpg&w=3840&q=75)
Qonun loyihasi qabul qilinishi natijasida investorlarning huquq va qonuniy manfaatlarini himoya qilish mexanizmlari kuchayishi, kapital bozorining investitsiyaviy jozibadorligi oshishi hamda mahalliy va xorijiy investitsiyalarni kengroq jalb etish uchun yangi imkoniyatlar yaratilishi kutilmoqda.
