O‘zbekistonda hafta davomida ob-havo qanday bo‘ladi?
O‘zbekiston bo‘ylab 4–11-oktabr kunlari havo o‘zgaruvchan bo‘ladi. O‘zgidromet ayrim hududlarda yomg‘ir yog‘ishi, tog‘li joylarda esa momaqaldiroq va qor kuzatilishi mumkinligini malum qildi.
Qoraqalpog‘iston, Xorazm, Buxoro va Navoiy viloyatlarida 4-oktabrda, shuningdek, 8–9-oktabr kunlari ayrim joylarda yomg‘ir kutilmoqda. Toshkent, Jizzax, Samarqand va Sirdaryo viloyatlarida yog‘ingarchilik 4–5 hamda 8–10-oktabr kunlari bo‘lishi mumkin. Qashqadaryoda 4–5 va 9–10-oktabrda, Surxondaryoda esa 5 va 9–10-oktabrda yomg‘ir yog‘ishi ehtimoli bor. Farg‘ona vodiysida yomg‘ir 4-oktabr kechqurun va 5-oktabrda kutilmoqda.
Tog‘ oldi va tog‘li hududlarda 4–5-oktabr kunlari ayrim joylarda kuchli yomg‘ir yog‘ib, momaqaldiroq bo‘lishi mumkin. Baland tog‘larda yog‘ingarchilik qorga aylanishi ehtimoli bor. 6–7-oktabrda respublikaning ko‘p hududlarida yog‘ingarchilik kutilmaydi.
Shamol aksariyat hududlarda 7–12 m/s, Farg‘ona vodiysida 5–10 m/s tezlikda esadi. 4-oktabrda shimoli-g‘arbiy hududlarda shamol 13–18 m/s, tog‘li joylarda 4–5-oktabrda 15–20 m/s gacha kuchayishi mumkin. Ayrim joylarda chang-to‘zon kuzatiladi.
Kunduzi harorat hududlarga qarab 4–5-oktabrda pasayib, hafta o‘rtalarida yana ko‘tariladi. Janubda 28–33 darajadan 18–23 darajagacha, shimoli-g‘arbda esa 12–17 darajadan 20–25 darajagacha o‘zgarishi kutilmoqda.
