O‘zbekistonda go‘sht importchilariga har kilogramm uchun 2,5 ming so‘mdan subsidiya berilishi belgilandi
Unga ko‘ra, 2027-yil 1-iyungacha sovitilgan mol va qo‘y go‘shti olib kirgan tadbirkorlarga har bir kilogramm mahsulot uchun 2,5 ming so‘mdan mablag‘ ajratiladi.
Agrar tarmoqda paxtachilikni rag‘batlantirish uchun ham davlat tomonidan alohida moliyaviy choralar ko‘rilmoqda. Jumladan, 2026-yil hosilidagi 1–3-navli paxta xomashyosining har bir tonnasiga 500 ming so‘mdan, o‘ziga biriktirilgan yerda paxta yetishtirgan klasterlarga esa har gektar maydon uchun 1,5 million so‘mdan subsidiya to‘lanadi. Shuningdek, 2027-2029-yillarda chorva uchun ozuqa yetishtiruvchi xo‘jaliklarga kosmik monitoring xulosasi asosida gektariga 500 ming so‘m ajratilishi rejalashtirilgan.
Suvni tejaydigan texnologiyalarni joriy etishda esa yangi yondashuv qo‘llanilib, 2027-yildan xarajatlarni qoplash bevosita erishilgan hosildorlik va mahsulot sifatiga bog‘lanadi. Shu bilan birga, sug‘urta sohasida intizomli dehqon xo‘jaliklari rag‘batlantirilib, uch yil davomida sug‘urta hodisasi yuz bermagan korxonalarga to‘rtinchi yildan e’tiboran 10 foizdan 20 foizgacha chegirma berish tartibi yo‘lga qo‘yiladi.
