O‘zbekistonda fermerlarga AI maslahat beradigan “Smart Fermer” ilovasi ishga tushiriladi
Prezident Shavkat Mirziyoyev chorvachilik va parrandachilikni rivojlantirish, go‘sht va sut mahsulotlari ishlab chiqarishni ko‘paytirish hamda sohaga zamonaviy texnologiyalarni joriy etish bo‘yicha taqdimot bilan tanishdi.
Unda O‘zbekiston Chorvadorlar uyushmasini tashkil etish taklifi ko‘rib chiqildi. Yangi uyushma chorvadorlar manfaatlarini himoya qilish, kooperatsiyani rivojlantirish, naslchilik, ilmiy tadqiqot va innovatsiyalarni qo‘llab-quvvatlash, moliyaviy ko‘mak berish hamda eksportni rivojlantirish bilan shug‘ullanadi.
Shuningdek, fermerlar va aholi uchun “Smart Fermer” yagona raqamli yordamchisi taqdim etildi. Mobil ilova orqali chorva mollarini identifikatsiya qilish, veterinar chaqirish, sun’iy urug‘lantirish, oziqlantirish va yaylovlarni boshqarish bo‘yicha ma’lumot olish, subsidiyalarga murojaat qilish hamda sun’iy intellekt yordamida maslahat olish imkoniyati yaratiladi.
