O‘zbekistonda bolalarga nisbatan jinsiy jinoyat sodir etganlarni kastratsiya qilish taklif etildi
Muhokama jarayonida senator Rustam Kalanov xalqaro amaliyotga tayanib, pedofillarga nisbatan jarrohlik kastratsiyasini qo‘llash taklifini ilgari surdi va bu kabi shaxslar jazosiz qolsa, jinoyatni takrorlash xavfi yuqori bo‘lishini ta’kidladi.
“Agar ularning jinoyati e’tiborsiz qolib, jazosiz ketsa, ular buni yana takrorlashi mumkin. Biz bunga yo‘l qo‘ymasligimiz kerak. Mening taklifim shuki, bunday qo‘shimcha kiritilsa yaxshi bo‘lardi”, degan senator.
Senat raisi Tanzila Narbayeva ushbu taklifga munosabat bildirib, dastlab yangi qabul qilingan qonun hujjatining amaliyotdagi ta’sirini baholash lozimligini va zarurat tug‘ilganda qonunchilikni yanada takomillashtirish masalasi ko‘rib chiqilishini ma’lum qildi.
Yuqori palata ma’quflagan qonun hujjatida voyaga yetmaganlarning jinsiy daxlsizligiga qarshi sodir etilgan og‘ir jinoyatlar uchun 25 yilgacha ozodlikdan mahrum qilish yoki umrbod qamoq jazosi belgilangan. Shuningdek, ushbu turdagi jinoyatlar bo‘yicha javobgarlikka tortish muddatlari qo‘llanilmaydi va bolaning o‘limiga sabab bo‘lgan shaxslarni muddatidan ilgari shartli ozod qilish qat’iyan taqiqlanadi.
