O‘zbekiston va Ozarbayjon “Abadiy do‘stlik” shartnomasini imzoladi. Bu hujjat nimani anglatadi?
O‘zbekiston va Ozarbayjon munosabatlarida yangi siyosiy bosqich boshlandi.
23-avgust kuni Toshkentdagi Ko‘ksaroy qarorgohida O‘zbekiston Prezidenti Shavkat Mirziyoyev va Ozarbayjon Prezidenti Ilhom Aliyev “Abadiy do‘stlik to‘g‘risida”gi shartnomani imzoladi. Hujjat Ozarbayjon Prezidentining O‘zbekistonga davlat tashrifi va Oliy davlatlararo kengashning uchinchi yig‘ilishi yakunlari bo‘yicha imzolangan eng muhim hujjat bo‘ldi.
Prezident Shavkat Mirziyoyev ushbu shartnomani sammitning eng muhim natijasi sifatida baholadi. Uning ta’kidlashicha, hujjat ikki davlat o‘rtasidagi hamkorlikni yanada chuqurlashtirish, mavjud imkoniyatlarni kengaytirish va umumiy kelajakni barpo etishga bo‘lgan intilishni ifodalaydi.
O‘zbekiston va Ozarbayjon o‘rtasidagi yaqinlashuv faqat tarixiy yoki madaniy aloqalar bilan cheklanmayapti.
So‘nggi yillarda ikki davlat munosabatlari strategik sheriklikdan ittifoqchilik darajasiga ko‘tarildi. Siyosiy muloqot muntazam tus oldi, savdo-iqtisodiy va investitsiyaviy loyihalar kengaydi, transport va logistika sohasida yangi imkoniyatlar paydo bo‘ldi.
Shartnoma bilan birga ikki davlat o‘rtasida iqtisodiyot, ijtimoiy soha, madaniyat va boshqa yo‘nalishlarni qamrab oluvchi qator amaliy hujjatlar ham imzolandi.
Ular orasida:
— pensiya ta’minoti sohasidagi hamkorlik to‘g‘risidagi bitim;
— madaniyat sohasidagi hamkorlik to‘g‘risidagi bitim;
— turizm sohasidagi hamkorlik to‘g‘risidagi bitim;
— 2030-yilgacha o‘zaro tovar ayirboshlash hajmini 1 milliard dollarga yetkazish dasturi;
— investitsiyalar va savdo sohasidagi kelishuvlarni amalga oshirish bo‘yicha amaliy harakatlar rejasi;
— tashqi ishlar va adliya vazirliklari o‘rtasida 2027–2028-yillarga mo‘ljallangan hamkorlik dasturlari;
— kinologiya sohasida hamkorlik memorandumi imzolandi.
Bundan tashqari, Urganch va Xonkendi, Buxoro va Lochin, Urganch va Naxchivon shaharlari o‘rtasida birodarlik munosabatlarini o‘rnatish bo‘yicha bayonnomalar imzolandi.
Demak, “Abadiy do‘stlik” nomi ostidagi siyosiy hujjat iqtisodiy va gumanitar loyihalar bilan to‘ldirilmoqda.
Ozarbayjon bilan imzolangan hujjat O‘zbekiston mustaqilligi tarixidagi birinchi “abadiy do‘stlik” shartnomasi emas.
Masalan, O‘zbekiston va Turkiya o‘rtasida “Abadiy do‘stlik va hamkorlik to‘g‘risida”gi shartnoma 1996-yil 8-mayda imzolangan va 1997-yil 18-noyabrda kuchga kirgan.
O‘zbekiston va Qozog‘iston o‘rtasida esa “Abadiy do‘stlik to‘g‘risida”gi shartnoma 1998-yil 31-oktabrda Toshkentda imzolangan, 2000-yil 17-yanvardan kuchga kirgan.
Shuningdek, Mustaqil O‘zbekiston tarixida Qirg‘iziston, Tojikiston va Markaziy Osiyo davlatlari bilan birgalikda XItoy bilan “abadiy do‘stlik” shartnomasiga (Ostona, 2025-yil 17-iyun) egadir.
