O‘zbekiston va Hindiston o‘rtasida 30 kunlik vizasiz tartib yo‘lga qo‘yiladi

Davlat rahbari Hindiston bosh vazirining O‘zbekistonga tashrifini tarixiy deb baholab, muzokaralar ikki davlat o‘rtasidagi do‘stlik, o‘zaro hurmat va ishonchning yana bir ifodasi bo‘lganini qayd etdi.

Tashrif yakunida Qo‘shma bayonot qabul qilindi va qator hukumatlararo bitimlar imzolandi. Shuningdek, O‘zbekiston va Hindiston o‘rtasidagi munosabatlar keng qamrovli strategik sheriklik bosqichiga ko‘tarildi.

Muzokaralarda asosiy e’tibor iqtisodiy hamkorlikka qaratildi. O‘tgan yili ikki mamlakat o‘rtasidagi savdo aylanmasi 33 foizga oshib, 1,3 milliard dollarni tashkil qilgan. Tomonlar bu ko‘rsatkichni 2030-yilgacha 5 milliard dollarga yetkazishni rejalashtirmoqda.

Tashrif doirasida qo‘shma investitsiya loyihalari portfeli ishlab chiqilib, bir qator yirik hind kompaniyalari bilan kelishuvlarga erishildi. Energetika, nodir minerallar, sog‘liqni saqlash, farmatsevtika, elektronika, mashinasozlik, zargarlik va qishloq xo‘jaligi hamkorlikning yangi istiqbolli yo‘nalishlari sifatida belgilandi.

Madaniy-gumanitar aloqalar haqida so‘z yuritilar ekan, O‘zbekistonda Hindistonning 4 ta oliygohi faoliyat yuritayotgani, shuningdek, Lal Bahodur Shastri va Mahatma Gandi nomidagi markazlar ishlab turgani qayd etildi.

Shuningdek, 30 kunlik vizasiz tartib va haftasiga 14 marta amalga oshirilayotgan havo qatnovlari ikki mamlakat o‘rtasidagi turizmni rivojlantirishga katta hissa qo‘shayotgani ta’kidlandi.

Erishilgan kelishuvlarni amalga oshirish uchun keng qamrovli “yo‘l xaritasi” ishlab chiqilishi belgilandi.