O‘zbekiston va AQSh rahbarlari dekabr oyida Mayamida muzokara o‘tkazadi
O‘zbekiston Respublikasi Prezidenti Shavkat Mirziyoyev Amerika Qo‘shma Shtatlari rahbari Donald Trampga mamlakat Mustaqilligi kuni hamda AQSh mustaqilligining 250 yillik qutlug‘ to‘yi munosabati bilan rasmiy tabrik maktubini yo‘lladi.
Prezident matbuot xizmati tomonidan ochiqlangan maktub tafsilotlariga ko‘ra, O‘zbekiston va AQSh o‘rtasidagi ko‘p qirrali munosabatlar o‘zaro hurmat, yuksak ishonch va keng qamrovli strategik sheriklik ruhida yangi bosqichga ko‘tarilayotgani mamnuniyat bilan qayd etilgan. Davlat rahbari ikki mamlakat o‘rtasidagi sheriklik salohiyatini yanada yuqori darajaga olib chiqish zarurligini ta’kidlagan.
Xususan, maktubda o‘zaro hamkorlikning eng ustuvor va strategik yo‘nalishlari sifatida savdo-iqtisodiy va investitsiyaviy aloqalarni tubdan kengaytirish, muhim mineral resurslarni birgalikda o‘zlashtirish va qayta ishlash, yuqori texnologiyalar hamda innovatsiyalar sohasida qo‘shma loyihalarni amalga oshirish, mintaqaviy va xalqaro xavfsizlikni ta’minlash borasidagi sheriklikni kuchaytirish ko‘rsatib o‘tilgan.
Maktubning eng muhim siyosiy jihatlaridan biri ikki davlat rahbarlarining bo‘lajak uchrashuviga oid bo‘ldi. Shavkat Mirziyoyev joriy yilning dekabr oyida AQShning Mayami shahrida o‘tkazilishi rejalashtirilgan “Katta yigirmalik” (G20) sammiti doirasida Donald Tramp bilan yuzma-yuz uchrashuv hamda muzokaralar o‘tkazishni intiklik bilan kutayotganini alohida bayon qilgan. Insayderlarga ko‘ra, ushbu uchrashuv ikki tomonlama munosabatlarning kelgusi yillardagi kun tartibini belgilab berishda muhim poydevor vazifasini o‘taydi.
Qutlov maktubi yakunida O‘zbekiston Prezidenti Shavkat Mirziyoyev AQSh Prezidenti Donald Trampga mustahkam sog‘liq, mas’uliyatli davlatchilik faoliyatida ulkan zafarlar, do‘st Amerika xalqiga esa bardavom tinchlik, yuksak farovonlik va barqaror ravnaq tilaklarini izhor etgan.
