O‘zbekiston Qozog‘iston bilan AES qurilishi va xavfsizligi bo‘yicha hamkorlik qiladi
Ikkala mamlakat ham o‘zining ilk atom elektr stansiyasi loyihalarini tatbiq etayotgan bir paytda Toshkent va Ostona o‘rtasida ochiq muloqot tashkil etilgan. Muzokaralar davomida O‘zbekiston tomoni loyihalash va tayyorgarlik jarayonlari, shuningdek, radiatsiya xavfsizligini nazorat qilish usullari haqida ma’lumot bergan. “O‘zatom” agentligi direktori Azim Ahmadxo‘jayev ushbu sohada xavfsizlik va qo‘shni davlatlar bilan shaffoflik eng ustuvor vazifa ekanini ta’kidlagan.
Uchrashuvda Ekologiya, Energetika va FVV vakillari Qozog‘iston tomonining texnik hamda ekologik savollariga javob berishdi. Qozog‘iston Ekologiya va tabiiy resurslar vaziri o‘rinbosari Mansur Oshurboyev mintaqada yadro energetikasining xavfsiz rivojlanishi har ikki davlat va butun Markaziy Osiyo aholisi manfaatlariga mos kelishini bildirgan.
Muzokaralarning muhim qismi kadrlar tayyorlash masalasiga bag‘ishlangan. O‘zbekiston vakillari mintaqa mutaxassislari uchun maxsus ixtisoslashtirilgan markaz konsepsiyasini taqdim etgan. Ushbu loyiha zamonaviy laboratoriyalar, trenajyor mashg‘ulotlari hamda Nuclear Knowledge Platform kabi raqamli tizimlar orqali sohaga oid bilim va tajribalarni birlashtirishni nazarda tutadi.
