Oʻzbekiston Prezidenti Toshkentda AQSh senatorini qabul qildi
Oʻzbekiston Respublikasi Prezidenti Shavkat Mirziyoyev 3-sentabr kuni AQSh Kongressi senatori, Senatdagi Markaziy Osiyo boʻyicha kokus hamraisi Stiv Deynsni qabul qildi. Bu haqida Prezident matbuot xizmati xabar berdi.
Uchrashuvda Oʻzbekiston va AQSh oʻrtasidagi strategik sheriklikni yanada mustahkamlash hamda parlamentlararo hamkorlikni rivojlantirish masalalari koʻrib chiqildi.
Soʻnggi yillarda ikki tomonlama hamkorlikni har qachongidan ham yuqori darajaga koʻtarishga erishilgani, muloqotlar va delegatsiyalar almashinuvi jadal surʼat kasb etgani qayd etildi.
Savdo-iqtisodiy va investitsiyaviy hamkorlikni kengaytirishga alohida eʼtibor qaratildi. Energetika, muhim minerallar, transport, qishloq xoʻjaligi, raqamli texnologiyalar va sanoat yoʻnalishlarida yirik loyihalar izchil amalga oshirilmoqda.
Hududlar oʻrtasida, xususan, senator vakili boʻlgan Montana shtati bilan aloqalarni yanada rivojlantirish istiqbollariga alohida urgʻu berildi.
“C5+1” formatidagi hamkorlik hamda xalqaro va mintaqaviy ahamiyatga molik dolzarb masalalar yuzasidan ham fikr almashildi.
