O‘zbekiston Gruziyadagi eng yirik chuqur dengiz porti qurilishida ishtirok etishi mumkin
O‘zbekistonning Gruziyadagi eng yirik chuqur dengiz portini barpo etish loyihasida ishtirok etish imkoniyatlari ko‘rib chiqildi. Bu haqda Investitsiyalar, sanoat va savdo vazirligi xabar berdi.
Ma’lum qilinadiki, 3–4-iyul kunlari investitsiyalar, sanoat va savdo vaziri Laziz Qudratov Gruziyaning Anakliya, Poti va Batumi portlari, shuningdek, Poti erkin sanoat zonasi faoliyati bilan tanishdi. Tashrif davomida O‘zbekistonning eksport-import operatsiyalarini Gruziya yo‘nalishi orqali kengaytirish masalalariga asosiy e’tibor qaratildi.
Anakliya porti qurilishi yakunlangach, barcha turdagi kemalarni qabul qilish imkoniyatiga ega bo‘ladi va Xitoy–Qirg‘iziston–O‘zbekiston yo‘nalishi doirasida xalqaro transport yo‘nalishlarining muhim bo‘g‘iniga aylanadi. Potida esa O‘zbekiston yuklari uchun ombor va terminal infratuzilmasini joylashtirish, Batumi portida esa Qora dengiz yo‘nalishi bo‘yicha yuk tashuvlarini rivojlantirish istiqbollari muhokama qilindi.
Tashrif yakunida O‘zbekiston kompaniyalari ishtirokida konsorsium tashkil etish hamda tegishli hamkorlik bitimlarini ishlab chiqish belgilandi.
3-iyul kuni O‘zbekiston Prezidenti Shavkat Mirziyoyev va Gruziya bosh vaziri Irakliy Kobaxidze boshchiligidagi muzokaralarda Poti va Batumi portlari infratuzilmasidan faol foydalanish choralari ko‘rib chiqilgan edi. Unda Gruziyada logistika xabini, sanoat zonasi va Oʻzbekiston mahsulotlari uchun shourum tashkil etish rejalari qoʻllab-quvvatlandi. Shuningdek, yangi ishga tushgan Boku-Tbilisi-Kars temiryoʻlini barpo etilayotgan Xitoy-Qirgʻiziston-Oʻzbekiston temiryoʻl magistrali bilan bogʻlash masalasini oʻrganish taklif etildi.
