O‘zbekiston dengizga chiqish imkoniyati bo‘lmagan davlatlar bilan transport aloqalarini rivojlantiradi
O‘zbekiston Iqtisodiyot va moliya vazirligida Dengizga chiqish imkoniyati bo‘lmagan rivojlanayotgan mamlakatlar xalqaro tadqiqot markazi (ITTLLDC – International Think Tank for Landlocked Developing Countries) vakillari bilan uchrashuv bo‘lib o‘tdi.
Muloqotda Iqtisodiyot va moliya vaziri o‘rinbosari Umid Abidxadjayev hamda ITTLLDC ijrochi direktori Damdin-Od Dulguun ishtirok etdi.
Uchrashuvda dengizga chiqish imkoniyati bo‘lmagan mamlakatlarning transport-logistika salohiyatini rivojlantirish, xalqaro transport yo‘laklariga integratsiyalashuvni kengaytirish, savdo xarajatlarini kamaytirish va mintaqaviy bog‘liqlikni mustahkamlash masalalari muhokama qilingan.
Shuningdek, ITTLLDCning asosiy faoliyat yo‘nalishlari — savdo, transport va tranzit bo‘yicha tadqiqotlar olib borish, dengizga chiqish imkoniyati bo‘lmagan davlatlar o‘rtasidagi hamkorlikni kuchaytirish, ularning tahliliy salohiyatini oshirish va xalqaro tashkilotlar bilan hamkorlik qilish masalalari yuzasidan fikr almashildi.
Uchrashuv yakunida transport-logistika, savdo-iqtisodiy rivojlanish va tahliliy tadqiqotlar sohasida hamkorlikni davom ettirishga kelishib olindi.
