O‘zbek yozuvchisi bitta kitobidan bir oy ichida 238 million so‘m daromad olib, rekord o‘rnatdi
“Qamar” kitoblar do‘koni tarmog‘ining xabar berishicha, mazkur asar bir oy ichida 7 220 nusxada sotilib, mahalliy mualliflar o‘rtasidagi eng yuqori ko‘rsatkichlardan birini qayd etdi.
Ushbu kitob ustidagi ishlar 2016-yilda boshlangan bo‘lib, ilk nashri 2019-yilda kitobxonga taqdim etilgan edi. Shundan buyon katta qiziqishga sabab bo‘lib kelayotgan trilogiya bugungacha o‘ndan ortiq marotaba qayta chop etildi.
Dastlab keng targ‘ibotsiz o‘quvchilar e’tiborini qozongan asarning parchalari keyinchalik 5-6-sinf adabiyot darsliklariga hamda “Yosh kitobxon” tanlovining majburiy adabiyotlar ro‘yxatiga kiritilgan. Bu holat kitobning yanada ommalashishiga va bolalar o‘rtasida keng tarqalishiga turtki bo‘ldi.
Ilgari bunday yuqori savdo hajmlari faqat xorijiy va turk adabiyoti tarjimalari hissasiga to‘g‘ri kelar edi. Mutaxassislarning ta’kidlashicha, ushbu rekord natija o‘zbek tilidagi zamonaviy bolalar adabiyotiga bo‘lgan talab va qiziqish yuqori darajada ekanini ko‘rsatib berdi.
