Ovchilik guvohnomasini berish onlayn bo‘ladi
9-sentyabr kuni qabul qilingan O‘RQ–1172-sonli qonunga muvofiq, ovchilik guvohnomasi Ekologiya va iqlim o‘zgarishi milliy qo‘mitasi tomonidan Yagona interaktiv davlat xizmatlari portali (my.gov.uz) orqali rasmiylashtiriladi. Hujjatni olish uchun talabgor 18 yoshga to‘lgan, muomala layoqatiga ega bo‘lishi, maxsus o‘quv kurslarini tamomlab, test sinovlaridan muvaffaqiyatli o‘tishi lozim. Guvohnomaning amal qilish muddati u tugagach, fuqaroning arizasiga ko‘ra uzaytirilishi mumkin.
Qonun bilan ov qilish hududlariga nisbatan ham yangi talablar belgilandi. Unga ko‘ra, ovchilik tadbirlari faqat maxsus ovchilik xo‘jaliklariga biriktirilgan hududlarda hamda Ekologiya va iqlim o‘zgarishi milliy qo‘mitasi tomonidan ajratiladigan erkin ov qilish joylarida amalga oshirilishi shart.
Shuningdek, ovchilik xo‘jaliklari o‘z pitomniklarida yovvoyi hayvonlarni to‘liq siklda yetishtirib, ov joylariga qo‘yib yuborgan taqdirda, ularni tutish uchun alohida ruxsatnoma olish talab etilmaydi. Xo‘jaliklar yil davomida qo‘yib yuborilgan miqdorga teng ravishda ovni tashkil etishi mumkin, biroq bu jarayon hayvonlarning ko‘payish davrida o‘tkazilmaydi. Ko‘payish mavsumi esa O‘zbekiston Fanlar akademiyasi Zoologiya institutining rasmiy xulosasiga ko‘ra belgilanadi. Mazkur hujjat e’lon qilingan kundan e’tiboran kuchga kirdi.
