Osiyo o‘yinlarida Markaziy Osiyo birinchisi bo‘lgan O‘zbekiston delegatsiyasi Toshkentda kutib olindi
Islom Karimov nomidagi Toshkent xalqaro aeroportida o‘tkazilgan kutib olish marosimida Bosh vazir Abdulla Aripov boshchiligidagi hukumat vakillari, Sport vazirligi, Milliy Olimpiya va Paralimpiya qo‘mitalari mutasaddilari hamda ko‘plab sportsevarlar qatnashdi. Tadbirda Bosh vazir sportchilarga davlat rahbarining samimiy tabrigini yetkazib, ularning xalqaro maydondagi mahoratini alohida e’tirof etdi.
Musobaqada O‘zbekiston vakillari 21 ta oltin, 25 ta kumush va 24 ta bronza – jami 70 ta medalni qo‘lga kiritib, umumjamoa hisobida 5-o‘rinni va Markaziy Osiyo mamlakatlari o‘rtasida birinchi o‘rinni egalladi.
Qit’aning 45 mamlakatidan 10 mingdan ortiq atletlar kuch sinashgan ushbu nufuzli turnirda O‘zbekiston sportchilari qator yo‘nalishlar bo‘yicha yuqori natijalarni namoyish etishdi.
