Olmaotada og‘ir jarohat olgan o‘zbekistonlik quruvchi vatanga olib kelindi
Ma’lum bo‘lishicha, fuqaro X.M. qurilishdagi ehtiyotsizlik oqibatida balandlikdan yiqilib tushgan va 15-avgustdan buyon Olmaotadagi shifoxonalardan birida davolanayotgan edi. Avgust oyining oxirida uning turmush o‘rtog‘i bemorni O‘zbekistonga olib o‘tishda ko‘mak so‘rab O‘zbekistonning Olmaotadagi Bosh konsulxonasiga murojaat qilgan.
Murojaatdan so‘ng diplomatiya vakolatxonasi hamda Migratsiya agentligi hamkorlikda fuqaroning salomatligi va tibbiy holatini inobatga olgan holda uni vatanga qaytarish bo‘yicha tezkor chora-tadbirlarni tashkillashtirdi. Natijada bemor va uning turmush o‘rtog‘i “Qoplonbek–Navoiy” chegara nazorat o‘tkazish punkti orqali O‘zbekiston hududiga olib o‘tildi.
Chegara postida bemorni Respublika shoshilinch tibbiy yordam ilmiy markazining maxsus tez tibbiy yordam avtomobili va shifokorlar brigadasi kutib oldi. Og‘ir jarohat olgan fuqaro malakali muolajalarni davom ettirish uchun darhol tegishli tibbiyot muassasasiga joylashtirildi.
