Olimpiada sovrindori va MOQ sobiq rahbari Sobir Ro‘ziyev vafot etdi
Sobir Ro‘ziyev o‘zbek sporti tarixida yorqin iz qoldirgan afsonaviy sportchilardan biri bo‘lgan. U qilichbozlik bo‘yicha 1980-yilda Moskvada o‘tkazilgan yozgi Olimpiya o‘yinlarida muvaffaqiyatli ishtirok etib, shohsupaga ko‘tarilgan va O‘zbekistonga kumush medalni taqdim etgan.
Olimpiada zafaridan tashqari, u jahon chempionatlarida ham barqaror natijalar ko‘rsatib, faoliyati davomida 2 ta oltin, 1 ta kumush hamda 1 ta bronza medalini qo‘lga kiritgan. Xalqaro maydondagi ulkan zafarlari va mamlakat sporti rivojiga qo‘shgan hissasi uchun unga “O‘zbekiston Respublikasida xizmat ko‘rsatgan sportchi” unvoni berilgan.
Katta sportdagi faoliyatini yakunlagach, Sobir Ro‘ziyev rahbarlik va tashkilotchilik yo‘nalishida samarali mehnat qilgan. U O‘zbekiston Milliy olimpiya qo‘mitasi prezidenti lavozimida faoliyat yuritib, mamlakatda olimpiya harakatini kengaytirish va yangi avlod sportchilarini tarbiyalash ishlariga bosh-qosh bo‘lgan.
Avvalroq “Toshkent yoʻlbarsi”, afsonaviy bokschi Rufat Risqiyev 76 yoshida vafot etgani xabar qilingan edi.
