Odirmon yodgorligidan kiyik va archa tasvirlangan noyob ostodon va 2300 yillik mehrob topildi
Madaniy meros agentligi ma’lum qiladiki, Samarqand arxeologiya instituti mutaxassisi Sanjar Abduraximov boshchiligida Odirmon shahar yodgorligida ilmiy tadqiqotlar olib borilmoqda.
Shimoli-sharqiy hududdan topilgan va olov izlari saqlanib qolgan altarning balandligi 70 santimetr hamda eni 90 santimetrni tashkil etadi. Inshoot tubiga maxsus pishgan kafelsimon g‘ishtlar terilgan bo‘lib, devorlaridagi ko‘p qatlamli loy suvoqlar ushbu qadamjodan uzoq asrlar davomida foydalanilganini ko‘rsatmoqda. Qazishma chog‘ida topilgan eng qimmatli topilmalardan biri ostodon bo‘lib, uning tashqi qismida kiyik hamda archa daraxti tasvirlari tushirilgan.
Mutaxassislar ushbu noyob naqshlar hamda ramzlar mazmunini buyumni to‘liq restavratsiya qilgandan so‘ng atroflicha o‘rganishni rejalashtirgan. Dastlabki tahlillarga ko‘ra, mazkur shahar xarobalari miloddan avvalgi III asrdan milodiy III asrgacha bo‘lgan davrga tegishli.
Ekspertlarning ta’kidlashicha, ushbu topilmalar hududda yashagan qadimgi ajdodlarning diniy e’tiqodi, ibodat tartiblari va dafn marosimlarini o‘rganishda nodir tarixiy manba hisoblanadi. Yodgorlikda arxeologik izlanishlar hamon davom ettirilmoqda.
Avvalroq Samarqanddagi qadimiy ibodatxona qoldiqlari orasidan haykalning bosh qismi topilgani xabar qilingan edi.
