Samarqanddagi qadimiy ibodatxona qoldiqlari orasidan haykalning bosh qismi topildi
Samarqand viloyati Urgut tumanidagi Qo‘rg‘ontepa yodgorligida olib borilayotgan arxeologik qazishmalar davomida ilk o‘rta asrlarga oid gips haykalning bosh qismi topildi. Bu haqda Madaniy meros agentlighi xabar berdi.
Topilma Samarqand arxeologiya instituti xodimlari Alisher Sandiboyev, Amriddin Berdimurodov, Navro‘z Alimov va San’at Xo‘jamov ishtirokidagi tadqiqotlar davomida qadimiy ibodatxona qoldiqlari orasidan aniqlangan.
Mutaxassislarga ko‘ra, haykalning yuz tuzilishi, soch turmagi va boshqa ikonografik xususiyatlari qadimgi So‘g‘d san’atini o‘rganishda muhim manba hisoblanadi. Topilma, shuningdek, Qo‘rg‘ontepa ibodatxonasining diniy-badiiy bezagi haqida yangi ma’lumotlar berishi mumkin.
Qazishmalar davomida ibodatxonaga tegishli xonalar qoldiqlari va boshqa arxeologik ashyolar ham aniqlangan. Ular majmuaning ichki tuzilishi, vazifasi hamda bu yerda o‘tkazilgan diniy marosimlarni o‘rganishga yordam beradi.
Madaniy meros agentligi direktorining birinchi o‘rinbosari Elmurod Najimovning ma’lum qilishicha, 2027-yildan boshlab arxeologik tadqiqotlarni, birinchi navbatda, yosh arxeologlarning loyihalarini qo‘llab-quvvatlash uchun har yili 25 milliard so‘mlik grantlar ajratiladi.
Ma’lumot uchun, 2024-yilda ham Qo‘rg‘ontepadagi ushbu ibodatxona qoldiqlari orasidan to‘rt qo‘lli ma’bud tasvirlangan devoriy rangtasvir hamda sopol haykalga tegishli qo‘l va oyoq qismlari topilgan edi.
