Nursulton Ro‘ziboyevga Ramzan Qodirov tomonidan yangi avtomobil sovg‘a qilindi
O‘zbekistonlik taniqli MMA jangchisi Nursulton Ro‘ziboyev o‘zining Instagram sahifasida yangi avtomobil bilan tushgan suratini joylashtirib, ushbu qimmatbaho sovg‘a uchun klub rahbariyatiga minnatdorlik bildirdi. Sportchi o‘z postida va’da berib, so‘zida turmaydiganlarga shama qilgan.
“Yutsang unday qilaman, bunday qilaman deb va’da beradiganlar ko‘p. Lekin jang natijasidan qat’i nazar, sovg‘a beradiganlar ham bor”, deb yozib qoldirgan Nursulton Ro‘ziboyev.
Ma’lumki, Nursulton Ro‘ziboyev 2026-yilning 27-iyun kuni Ozarbayjon poytaxti Boku shahrida o‘tkazilgan nufuzli UFC turnirida rossiyalik sportchi Andrey Pulyayevga qarshi oktagonga ko‘tarilgan edi. O‘rta vazn toifasida kechgan mazkur jangda o‘zbekistonlik sportchi yaqqol ustunlik namoyish etib, raqibini birinchi raundning o‘zidayoq bo‘g‘ish usuli bilan mag‘lub etgan va UFC faoliyatidagi yana bir ishonchli g‘alabani rasmiylashtirgan.
Ro‘ziboyev 2015-yildan buyon Chechenistonning “Axmat” jangovar klubi sharafini himoya qilib keladi. Sportchining jahonning eng nufuzli jangovar tashkiloti – UFC’dagi muvaffaqiyatli yurishidan so‘ng, klub rahbariyati uni munosib rag‘batlantirishga qaror qilgan.
Avvalroq 13 oylik tanaffusdan keyin ringga qaytgan 32 yoshli o‘zbek jangchisi jarohatsiz chiqib, 15-avgust kuni Filadelfiyadagi UFC 330 turnirida navbatdagi jangini o‘tkazishi mumkinligi aytilgan edi.
