Noyabrdan Toshkentda isitish va issiq suv narxi 30 foizga oshishi kutilmoqda
Qurilish va uy-joy kommunal xo‘jaligi vazirligi tegishli hukumat qarori loyihasini jamoatchilik muhokamasiga qo‘ygan bo‘lib, ushbu takliflar 28-oktyabrgacha ko‘rib chiqiladi.
Hujjat loyihasiga ko‘ra, Toshkent shahrida aholi uchun isitish tarifi bir sutkada isitiladigan maydonning har bir kvadrat metri uchun 241,44 so‘mdan 314 so‘mgacha ko‘tarilishi rejalashtirilgan. Hisoblagichi bor xonadonlarda issiq suvning bir kub metri narxi 8 928,67 so‘mdan 11 607 so‘mga oshishi nazarda tutilgan.
Qiziqarlisi shundaki, hisoblagichi bo‘lmagan xonadonlar uchun issiq suv to‘lovi bir kishi hisobiga 52 303,39 so‘mdan 45 330 so‘mgacha pasayishi kutilmoqda. Bunga ilgari qo‘llangan 1,5 baravarlik oshiruvchi koeffitsiyentning bekor qilinayotgani sabab bo‘ladi. Umumiy dush xonasiga ega yotoqxonalarda ham bir kishilik oylik to‘lov 33 720 so‘mgacha tushiriladi.
Bundan tashqari, 2028-yildan e’tiboran markazlashgan isitish tariflarini har yili 1-may holatiga ko‘ra inflyatsiyaga mos ravishda indeksatsiya qilib borish taklif etilmoqda. Bunda narxlarning bir martalik yillik o‘sishi 10 foizdan oshmasligi qat’iy belgilanishi ko‘zda tutilgan.
