Migratsiya agentligida rahbar almashdi: Behzod Musayev o‘rniga Muxsinxo‘ja Abdurahmonov tayinlandi
Prezidentning tegishli qarorlari bilan Muxsinxo‘ja Abdurahmonov Vazirlar Mahkamasi huzuridagi Migratsiya agentligi direktori etib tayinlandi. Bu haqda davlat rahbarining matbuot xizmati xabar berdi.
U 2021-yil iyulidan buyon O‘zbekistonning Yaponiyadagi elchisi sifatida faoliyat yuritib kelayotgan edi.
Muxsinxo‘ja Abdurahmonov 52 yoshda. U 1996-yilda Toshkent iqtisodiyot universitetini tamomlagan. 1994–1995-yillarda AQShning Chiko shahridagi Kaliforniya davlat universitetida stajirovka o‘tagan, 1996–1998-yillarda Prezident huzuridagi Davlat va jamiyat qurilishi akademiyasida tahsil olgan.
1998–2001-yillarda Yaponiyaning Otaru kommersiya universitetida magistratura, 2001–2004-yillarda Xokkaydo universitetida doktorantura bosqichida o‘qigan. Keyinchalik shu universitetda ilmiy tadqiqotchi sifatida faoliyat olib borgan.
Abdurahmonov mehnat faoliyati davomida xususiy sektor va davlat boshqaruvida turli lavozimlarda ishlagan. Jumladan, 2004–2006-yillarda Coca-Cola Uzbekistan LLC kompaniyasida menejer, 2008–2017-yillarda Yaponiyaning MTRUST kompaniyasida bosh direktor bo‘lgan.
2018–2021-yillarda Farg‘ona viloyati hokimi o‘rinbosari — investitsiyalar va tashqi savdo boshqarmasi boshlig‘i lavozimida ishlagan. Shundan so‘ng Tashqi ishlar vazirligining investitsiyalar bo‘yicha boshqarmasiga rahbarlik qilgan. 2021-yilda esa O‘zbekistonning Yaponiyadagi elchisi etib tayinlangan.
Shu bilan birga, Behzod Musayev boshqa ishga o‘tishi munosabati bilan Migratsiya agentligi direktori lavozimidan ozod etildi.
Behzod Musayev agentlikka 2024-yil sentabrida rahbar etib tayinlangan edi. Bungacha u kambag‘allikni qisqartirish va bandlik vaziri bo‘lib ishlagan. Shuningdek, turli yillarda sog‘liqni saqlash vaziri, bosh vazir o‘rinbosari, Hisob palatasi hamda Davlat soliq qo‘mitasi raisi lavozimlarida faoliyat yuritgan.
