Moskvada O‘zbekistonga uchayotgan yo‘lovchi bagajidan 30 kg dan ortiq radioaktiv qo‘ziqorin topildi
19-oktabr kuni Moskva yaqinidagi Domodedovo aeroportida O‘zbekistonga uchmoqchi bo‘lgan 32 yoshli chet ellik yo‘lovchining bagajidan radiatsiya darajasi oshgan quritilgan oq qo‘ziqorin aniqlandi. Bu haqda Rossiya Federal bojxona xizmati ma’lum qildi.
Yo‘lovchi bagajga umumiy og‘irligi 31 kilogramm bo‘lgan qutini topshirgan. Yorlig‘ida mahsulot Rossiyadagi kompaniyalardan birida ishlab chiqarilgan quritilgan oq qo‘ziqorin deb ko‘rsatilgan. Yo‘lovchining fuqaroligi va ishlab chiqaruvchi nomi ochiqlanmagan.
Yukni tekshirish paytida bagajni yig‘ish zonasida “Yantar” radiatsion nazorat tizimi signal bergan. Bu tizim radioaktiv moddalarni aniqlaydi. Inspektorlar qutini ochib, ichidan zavod karton paketini topgan. Paketdagi sochiluvchan modda quritib, maydalangan qo‘ziqorin bo‘lgan.
Ko‘chma radiometr-spektrometr tekshiruvi nurlanish foni odatiy darajadan 10 barobardan ortiq ekanini ko‘rsatgan. Dastlabki tahlilda radioaktiv izotop seziy-137 aniqlangan. Bu sun’iy modda yadroviy faoliyat va avariyalar natijasida paydo bo‘ladi va oziq-ovqatda bo‘lmasligi kerak.
Bojxonachilar ma’lumotni darhol Rossiyaning iste’molchilar huquqini himoya qilish va sanitariya nazorati xizmatiga yuborgan. Idora qo‘ziqorinni radioaktiv chiqindi deb topgan. Bunday chiqindi oddiy axlatga tashlanmasligi, va belgilangan tartibda ko‘milishi ta’minlangan.
Ishlab chiqaruvchiga ko‘rsatma berilgan va zarar yetkazmaslik choralari belgilanagan. “Quritilgan oq qo‘ziqorin” bo‘yicha Yevroosiyo iqtisodiy ittifoqi muvofiqlik deklaratsiyasining amali to‘xtatilgan. Shuningdek, ushbu hujjat asosida mahsulotni chiqarish va sotish ham to‘xtatilgan.
