“Milliardlab tonna neftimizni tashib ketishgan”. Ozarbayjon prezidenti sobiq ittifoq yillarini keskin tanqid qildi
Ozarbayjon prezidenti Ilhom Aliyev IV Shusha global media forumida so‘zlagan nutqida XIX asr va sovet ittifoqi davrida Ozarbayjon huquqsiz, resurslari faqat tashib ketiladigan hudud bo‘lganini ta’kidladi.
Uning qayd etishicha, o‘sha davrlarda mamlakatdan milliardlab tonna neft qazib olingan bo‘lsa-da, ittifoq parchalanganida Ozarbayjon gaz va elektr energiyasiz qolib ketgan. Bugungi kunda ham Boku atrofidagi sobiq ittifoq davridan qolgan ekologik zararlarni bartaraf etish va hududlarni tozalash uchun milliardlab mablag‘ sarflanmoqda.
“Agar, masalan, XIX-XX asrlardagi mustamlakachilik davridagi Ozarboyjonga va bugungi mustaqil Ozarboyjonga qarasangiz, bu xuddi kun va tundek farq qiladi. Bizdan faqat resurslarni olib ketishgan. Milliardlab tonna neft qazib olingan, barrel emas, aynan tonna”, degan u.
Aliyev 30 yildan ortiq mustaqillik davrida Ozarbayjon o‘rta quvvatli davlatga aylanganini hamda ittifoq parchalangan paytda uning tarkibidagi respublikalar “markazsiz yashay olmaydi| degan bashoratlar o‘zini oqlamaganini bildirdi. Bugungi kunda barcha sobiq respublikalar mustaqil va normal hayot kechirmoqda, bu esa mustaqillikning eng katta yutug‘idir.
