Markaziy Osiyo va Koreya savdosi 5,7 mlrd dollarga yetdi
Iqtisodiy tadqiqotlar va islohotlar markazi Seulda o‘tadigan birinchi “Markaziy Osiyo – Koreya Respublikasi” sammiti arafasida e’lon qilgan hisobotga ko‘ra, mintaqadan Janubiy Koreyaga eksport 1 milliard dollarni, import esa 4,7 milliard dollarni tashkil etgan. Davlatlar kesimida yetakchilik 3,2 milliard dollar (56 foiz) ko‘rsatkich bilan Qozog‘istonga tegishli bo‘lsa, O‘zbekiston 1,7 milliard dollar (30 foiz) bilan ikkinchi o‘rinni egalladi. Mintaqaga kiritilgan 1,5 milliard dollarlik Koreya investitsiya va kreditlarining asosiy qismi ham ushbu ikki davlatga yo‘naltirildi.
O‘zbekiston va Janubiy Koreya o‘rtasidagi savdo aylanmasini yaqin yillarda 2 milliard dollarga yetkazish rejalashtirilgan. 2025-yil natijalariga ko‘ra, o‘zaro tovar ayirboshlash hajmi 1,7 milliard dollarni tashkil etdi. O‘zbekiston eksportining asosiy qismini xizmatlar ko‘rsatish sohasi tashkil qilgan bo‘lsa, Koreyadan keltirilgan import mahsulotlarining qariyb 61 foizi mashina va transport uskunalariga to‘g‘ri keldi.
Ijobiy dinamika 2026-yilning birinchi yarmida ham davom etib, o‘zaro savdo ko‘rsatkichi 11,5 foizga o‘sdi va 940 million dollarga yetdi. Avgust holatiga ko‘ra, mamlakatimizda Koreya kapitali ishtirokidagi 730 ta korxona faoliyat ko‘rsatmoqda. So‘nggi o‘n yillikda ushbu mamlakatdan O‘zbekiston iqtisodiyotiga 2 milliard dollarga yaqin to‘g‘ridan-to‘g‘ri investitsiyalar jalb etilgan.
Ayni paytda davlat tashrifi bilan Seulda bo‘lib turgan prezident Shavkat Mirziyoyev 16-sentyabr kuni Seulda o‘tkaziladigan birinchi “Markaziy Osiyo – Koreya Respublikasi” sammitida ishtirok etadi.
