Mang‘istau viloyatida halok bo‘lgan va jabrlangan harbiylarning oilalariga 2,5 milliard tengaga yaqin moliyaviy yordam ajratiladi
Xayriya tashabbusida “Adolat” partiyasi a’zolari, yirik biznes vakillari hamda Milliy Qurultoy deputatlari faol qatnashmoqda. Xususan, partiyaning Biznes kengashi 1,5 milliard tenge yig‘ishni o‘z zimmasiga olgan bo‘lsa, Xalq kengashi a’zolari 815 million tenge, deputatlar esa 146 million tengedan ortiq mablag‘ shakllantirdi.
Yig‘ilgan mablag‘lar maxsus jamg‘arma orqali va bevosita marhumlarning yaqinlariga topshiriladi.
Bunga qo‘shimcha ravishda Air Astana aviakompaniyalar guruhi ham jabrlanganlarning yaqin qarindoshlariga mamlakat ichidagi reyslar uchun bepul aviachiptalar ajratilishini e’lon qildi. Fojiadan omon qolganlar hamda marhumlarning ota-onasi, turmush o‘rtog‘i, farzandlari hamda jigarlariga oktyabr oyi boshigacha parvoz qilish imkoniyati yaratildi.
Eslatib o‘tamiz, 24-sentyabr kuni Mang‘istau viloyatidagi mashg‘ulotlar chog‘ida ob-havo keskin yomonlashishi sababli 17 nafar harbiy xizmatchini dengiz oqimi olib ketgan edi. Qidiruv amaliyoti natijasida 3 kishi qutqarilib, 14 nafar harbiyning jasadi topildi. Mazkur holat yuzasidan jinoyat ishi qo‘zg‘atilib, xavfsizlik qoidalarini buzish va ehtiyotsizlikda ayblanib Mudofaa vazirligining 5 nafar yuqori martabali harbiysi va komandiri qamoqqa olingan.
Keyinroq harbiy mashg‘ulotlarda halok bo‘lganlar orasida Qoraqalpog‘istonda tug‘ilgan askar ham borligi ma'lum qilindi.
