Qozog‘istonda harbiy mashg‘ulot vaqtida 14 nafar harbiy halok bo‘ldi
Qozog‘istonning Mang‘istov viloyatida 24-sentabr kuni Harbiy-dengiz kuchlarining mashg‘ulotlari vaqtida 14 nafar harbiy xizmatchi halok bo‘ldi. Fojia Kaspiy dengizida ob-havoning keskin yomonlashuvi va shamolning kuchayishi ortidan yuz bergan.
Dastlabki ma’lumotlarga ko‘ra, mashg‘ulotlar vaqtida 17 nafar harbiy dengizga tushib ketgan. Ulardan uch nafari qutqarilgan, qolganlarini qidirish ishlari boshlangan.
25-sentabr kuni soat 09:15 atrofida bedarak yo‘qolgan ikki harbiy xizmatchining — serjant Mansur G‘umarov va matros Miras Turdibekulining jasadi topilgan. Shu bilan halok bo‘lgan harbiylar soni 14 nafarga yetgan. Qutqarilgan harbiylardan biri shifoxonaga olib ketilgan bo‘lib, uning ahvoli barqaror, hayotiga xavf yo‘q.
Hodisadan so‘ng Kaspiy dengizida keng ko‘lamli qidiruv-qutqaruv ishlari olib borildi. Operatsiyaga Mudofaa vazirligi, Milliy xavfsizlik qo‘mitasi Chegara xizmati, Favqulodda vaziyatlar vazirligi, Ichki ishlar vazirligi va Mang‘istov viloyati hokimligi vakillari jalb etildi.
Qidiruv ishlarida 252 nafar xodim, 34 ta maxsus texnika, 37 nafar harbiy g‘avvos, 14 ta kema va kater hamda 20 dan ortiq havo kemasi, jumladan, to‘rtta vertolyot qatnashgan. Dengiz hududi, qirg‘oqbo‘yi va unga tutash joylar havodan hamda suv orqali muntazam tekshirilgan.
Voqea yuzasidan Hukumat komissiyasi tuzilib, unga bosh vazir o‘rinbosari Kanat Bozumbayev rahbarlik qilmoqda. Komissiya hodisaning sabablarini va harbiy mashg‘ulotlarni tashkil etish hamda qutqaruv ishlarini olib borishdagi barcha holatlarni o‘rganmoqda.
Fakt bo‘yicha jinoyat ishlari qo‘zg‘atilgan. Tergov harbiy xizmatga loqayd munosabatda bo‘lish hamda kema boshqaruvi qoidalarini buzish bilan bog‘liq moddalar asosida olib borilmoqda. Mashg‘ulotlar va qutqaruv ishlarini tashkil etishda qoidabuzarlikka yo‘l qo‘yganlikda gumon qilinayotgan mansabdor shaxslar aniqlangan. Zarur ekspertizalar tayinlangan.
Hukumat komissiyasi halok bo‘lgan harbiylarning oilalariga moddiy va boshqa zarur yordam ko‘rsatilishini ma’lum qilgan. Mang‘istov viloyati hokimligi tomonidan yordam mablag‘larini yig‘ish uchun maxsus jamg‘arma ham tashkil etilgan. Ayrim tadbirkorlar va jamoat vakillari ham marhumlarning oilalariga moliyaviy ko‘mak ko‘rsatishini bildirgan.
Qozog‘iston prezidenti Qosim-Jomart Toqayev qaroriga ko‘ra, 25-sentabr mamlakatda Mang‘istovdagi fojiada halok bo‘lgan harbiy xizmatchilar xotirasiga umumxalq motam kuni deb e’lon qilindi.
Voqea munosabati bilan O‘zbekiston prezidenti Shavkat Mirziyoyev va Qirg‘iziston prezidenti Sadir Japarov Qozog‘iston prezidenti Qosim-Jomart Toqayevga, halok bo‘lgan harbiylarning oila a’zolariga hamda Qozog‘iston xalqiga chuqur hamdardlik bildirdi. Toqayev xalqaro hamdardlik va birdamlik uchun minnatdorlik bildirgan.
