Loqaydlik uchun bo‘shatilgan elchi o‘rniga Nuriddin Mamajonov Belarusga yuborildi
“Dunyo” axborot agentligi xabariga ko‘ra, 45 yoshli diplomat Nuriddin Mamajonov O‘zbekistonning Belarusdagi diplomatik vakolatxonasiga rahbarlik qiladi. U tayinlovga qadar Farg‘ona viloyati hokimining investitsiyalar va tashqi savdo masalalari bo‘yicha o‘rinbosari lavozimida faoliyat yuritgan.
N.Mamajonov Jahon iqtisodiyoti va diplomatiya universiteti, Chexiyaning Markaziy Bogemiya universitetini tamomlagan hamda Yevropa amaliy fanlar va menejment institutida DBA darajasini olgan. U faoliyati davomida Adliya va Tashqi ishlar vazirliklarida, O‘zbekistonning Germaniyadagi elchixonasi va Frankfurtdagi Bosh konsulxonasida, shuningdek, Xitoydagi elchixonada maslahatichi va TIVning Iqtisodiy diplomatiya departamenti boshlig‘i o‘rinbosari lavozimlarida ishlagan.
Yangi elchi 2024-2026-yillarda Minskda diplomatik missiyani boshqargan Rahmatulla Nazarovning o‘rnini egalladi.
Avvalroq Prezident Shavkat Mirziyoyev sobiq elchini investitsiyalarni jalb etish hamda tashqi savdo masalalariga loqayd munosabatda bo‘lgani sababli lavozimidan ozod etgan edi.
