O‘zbekistonning Belarusdagi elchisi ishdan olindi. Qator davlatlardagi elchilar faoliyati tanqid qilindi
Prezident Shavkat Mirziyoyev raisligida o‘tkazilgan videoselektor yig‘ilishida xorijdagi diplomatik vakolatxonalar va investitsiya loyihalari ijrosi tanqid qilindi.
Oliy darajadagi 52 ta tashrif doirasida 213 milliard dollarlik 1 617 ta investitsiya loyihasi bo‘yicha kelishuvlarga erishilgan bo‘lsa-da, ularning nazoratida sustkashlikka yo‘l qo‘yilgani ta’kidlandi. Endilikda ushbu “yo‘l xaritalari” Hisob palatasi va Tashqi ishlar vazirligi tomonidan yuritiladi. Bosh vazirga har hafta loyihalar ijrosini muhokama qilib borish topshirildi.
Yig‘ilishda xorijdagi elchilar faoliyatiga ham e’tiroz bildirildi. Investitsiya va tashqi savdo masalalariga befarqligi uchun O‘zbekistonning Belarusdagi elchisi Rahmatulla Nazarov lavozimidan ozod etildi. Fransiya, Avstriya, Ispaniya, Italiya, O‘mon, Indoneziya, Malayziya va Singapurdagi elchilar faoliyati ham yetarsiz deb topildi.
Prezident Administratsiyasi rahbari Saida Mirziyoyevaga maxsus komissiya tuzib, diplomatik vakolatxonalar ishini tahlil qilish hamda o‘z vazifasini uddalay olmagan xodimlarni yosh, zamonaviy kadrlar bilan almashtirish bo‘yicha takliflar kiritish vazifasi yuklatildi.
