Lamine Yamalning Falastin bayrog’iga o'ralgan holda tushgan suratlari feyk bo‘lib chiqdi
Soxta rasmni X’dagi @mohamed_7G akkaunti 19-iyul kuni “Kunning eng chiroyli surati” deb e’lon qildi. Unda Yamal o‘yin maydonida Jahon chempionati kubogini ushlab, Falastin bayrog‘iga o‘ralgan holda tabassum qilib turgani ko‘rsatilgan. Rasm millionlab ko‘rishlarga ega bo‘ldi. Biroq akkaunt tez orada o’chirib yuborildi.
OpenAI ning maxsus tekshiruv vositasi rasmda Google tomonidan ishlab chiqilgan SynthID yashirin AI belgisini aniqladi. Bu belgi ChatGPT kabi OpenAI vositalari orqali yaratilgan kontentni ko‘rsatadi.
Unsurface media autentifikatsiya vositasi ham rasmning “forensik izlariga” asoslanib, uni “ehtimol AI tomonidan yaratilgan” deb baholadi.
Maldita.es ekspertlari rasmda deformatsiyalangan qo‘llar kabi sintetik belgilar borligini qayd etdi.
Teskari qidiruv natijasida asl surat Getty Images va FIFA rasmiy materiallaridan topildi. Unda Yamal “Campeones” yozuvi tushirilgan Ispaniya futbolkasida, Falastin bayrog‘isiz ko‘rinadi. Yamalning o‘z Instagram akkauntida 20-iyul kuni joylashtirilgan real surat ham xuddi shu pozani tasdiqlaydi.
Lead Stories tahliliga ko‘ra, soxta rasm Yamalning Instagramdagi asl suratiga juda o‘xshash, faqat bayroq qo‘shilgan va yuz ifodasi o‘zgartirilgan. FC Barcelona, Fox Sports, BBC va ESPN kabi ishonchli manbalarning fotosuratlarida ham bayroq yo‘q.
Yamal 2026-yil 11-may kuni FC Barcelona La Liga chempionligini nishonlash uchun ochiq avtobusda Barcelona ko‘chalarida yurganida haqiqatan ham Falastin bayrog‘ini ko‘targan edi. U muxlisdan bayroqni so‘rab olib, bir necha daqiqa davomida hilpiratgan va keyin o‘z Instagramida suratini joylagan.
Isroil Mudofaa vaziri Israel Katz Yamalni “Isroilga qarshi nafrat uyg‘otishda” aybladi va Barselonadan masofani saqlashni talab qildi.Ispaniya Bosh vaziri Pedro Sanchès esa Yamalni himoya qilib: “Davlat bayrog‘ini hilpiratishni ‘nafrat uyg‘otish’ deb biladiganlar aqlini yo‘qotgan yoki o‘z sharmandalariga ko‘r bo‘lib qolgan. Lamine millionlab ispanlarning Falastinga bo‘lgan hamdardligini ifoda etdi. Bu bizni undan yana bir bor faxrlanishimiz uchun sabab”, deb yozdi.
2026-yil iyul oyidagi Jahon chempionati g‘alabasidan keyingi “Falastin bayrog‘li” surat to‘liq soxta va AI yordamida yaratilgan. Haqiqiy qo‘llab-quvvatlash esa may oyida La Liga bayramida sodir bo‘lgan. Shuningdek, Portal24 jamoasi ijtimoiy tarmoqlarda tarqalayotgan kontentni o’z sahifangizga joylashingizdan avval tekshiringizni tavsiya qilamiz.
