Jazoir BAA bilan diplomatik aloqalarni uzdi hamda elchiga 48 soat vaqt berdi
Jazoir Tashqi ishlar vazirligiga chaqirilgan BAA elchisiga rasmiy qaror topshirilib, mamlakat hududini tark etishi uchun 48 soat muddat berildi. Shuningdek, respublika hukumati BAAda ro‘yxatdan o‘tgan fuqarolik va harbiy havo kemalari uchun o‘z havo hududini yopishini ma’lum qildi. Shunga qaramay, amaldagi kelishuvlar doirasidagi tijorat aviareyslari 2026-yil oxiriga qadar faoliyatini davom ettiradi.
O‘z navbatida, BAA Tashqi ishlar vazirligi ushbu qaror vaqtinchalik xarakterga ega bo‘lishiga umid bildirib, ikki davlat xalqlari o‘rtasidagi rishtalarni yuqori qadrlashini ta’kidladi. Biroq ikki mamlakat o‘rtasidagi ziddiyatlar so‘nggi yillarda Isroil bilan aloqalarni normallashtirish, G‘arbiy Sahro muammosi va Sahel hududidagi siyosiy jarayonlar kabi qator mintaqaviy masalalarda keskin qarama-qarshiliklar sababli chuqurlashib borayotgan edi.
BAA G‘arbiy Sahro masalasida Jazoirning asosiy raqobi bo‘lmish Marokashni ochiq qo‘llab-quvvatlaydi va Marokash suverenitetini tan oladi. Jazoir esa ushbu hudud mustaqilligi tarafdori bo‘lgan “Polisario” frontiga xayrixoh.
Jazoir prezidenti Abdulmadjid Tebbun avval ham BAA rahbariyatini mintaqadagi barqarorlikka salbiy ta’sir o‘tkazishda ayblagan. U iyul oyidagi chiqishida diplomatik aloqalarni uzish masalasi anchadan buyon kun tartibida bo‘lganini, biroq arab dunyosidagi parokandalikni yanada kuchaytirmaslik maqsadida ushbu qaror ortga surib kelinganini bildirgan edi.
