Javohir Sindorov va Gukesh Dommaraju o‘rtasidagi jahon toji bahslari vaqti aniq bo‘ldi
Tarixiy bellashuv 2026-yilning 22-noyabridan 13-dekabriga qadar Shveysariyaning Jeneva shahridagi Martin Bodmer jamg‘armasi muzeyida bo‘lib o‘tadi. Partiyalar Toshkent vaqti bilan soat 19:00 da start oladi.
Musobaqa Dasturiga ko‘ra, tantanali ochilish marosimi 22-noyabr kuni, ilk klassik partiya esa 24-noyabrda o‘tkaziladi. Umumiy hisobda 14 ta klassik partiyadan iborat bo‘ladigan turnirda birinchi bo‘lib 7,5 ochko to‘plagan shaxmatchi jahon chempioni nomiga sazovor bo‘ladi. Asosiy bahslar durang bilan yakun topgan taqdirda, g‘olib nomi 12-dekabr kuni o‘tkaziladigan tay-breykda aniqlanadi. Turnirning umumiy mukofot jamg‘armasi 2,5 million dollarni tashkil etib, g‘olib 1,3 million, mag‘lub esa 1,2 million dollarni qo‘lga kiritadi.
Ushbu qarama-qarshilik shaxmat sohasida bir qator rekordlarni yangilashi kutilmoqda. Bellashuvlar boshlangan vaqtda har ikki ishtirokchi ham 20 yoshda bo‘ladi va bu voqea shaxmat tarixidagi eng yosh shaxmatchilar o‘rtasidagi jahon chempionligi bahsi sifatida qayd etiladi. Shuningdek, Javohir Sindorov O‘zbekiston tarixida mutlaq jahon chempioni unvoni uchun kurashadigan birinchi shaxmatchiga aylandi.
Ma’lumot uchun, shaxmat bo‘yicha jahon toji uchun kechadigan bunday nufuzli turnir 2004-yildan buyon ilk marotaba Shveysariya hududida tashkil etilmoqda.
