Javohir Sindorov AQShda shohsupaga ko‘tarilib, $58 mingdan ziyod mukofotni qo‘lga kiritdi
Klassik shaxmat bo‘yicha 9 turdan iborat kechgan murosa va murosasiz bahslarda Sindorov ketma-ket ikki g‘alabadan so‘ng so‘nggi bosqichga yetib keldi. Hal qiluvchi 9-turda qora donalarda amaldagi chempion amerikalik Uesli Soga qarshi donalar surgan shaxmatchiga chempionlik imkoniyatini saqlab qolish uchun faqat g‘alaba zarur edi. Biroq murakkab kechgan partiya durang natija bilan yakunlandi.
Yakunda 5 ochko jamg‘argan Javohir Sindorov qo‘shimcha ko‘rsatkichlar bo‘yicha 3-o‘rinni egalladi. Germaniyalik Vinsent Keymer ham shuncha ochko bilan bronza medaliga ega chiqdi. Turnir g‘olibligi esa 5,5 ochkodan to‘plagan Uesli So hamda hindistonlik Rameshbabu Praggnanandhaa o‘rtasidagi tay-brekda hal bo‘ldi va unda amerikalik grossmeyster zafar quchgan.
Ushbu muvaffaqiyati evaziga Javohir Sindorov 58 125 dollar pul mukofotini qo‘lga kiritdi. Umumiy mukofot jamg‘armasi 475 ming dollarni tashkil etgan musobaqada dunyoning Fabiano Karuana, Levon Aronyan, Anish Giri va Maksim Vashye-Lagrav kabi eng kuchli shaxmatchilari g‘oliblik uchun kuch sinashgan edi.
