Ishdan bo‘shatilgan va ish topa olmagan fuqarolarga ikki yil oldin pensiyaga chiqish huquqi berildi
Hukumatning 519-sonli qaroriga ko‘ra, tegishli ma’muriy reglament amaliyotga joriy etildi.
Yangi tartibga ko‘ra, ish staji kamida 25 yil bo‘lgan 58-60 yoshli erkaklar hamda kamida 20 yil stajga ega 53-55 yoshli ayollar ushbu imkoniyatdan foydalanishi mumkin. Buning uchun fuqarolar Yagona interaktiv davlat xizmatlari portali (YIDXP) orqali elektron ariza topshirishi hamda mehnat shartnomasi bekor qilingani haqidagi buyruq nusxasini ilova qilishi talab etiladi.
Arizalar mahalliy mehnat organlari tomonidan ikki ish kuni ichida ko‘rib chiqilib, murojaatchi ish qidirayotgan shaxs sifatida ro‘yxatga olinadi. Agar uch oy davomida fuqaroga mos keladigan ish topib berilmasa, u ishsiz deb topiladi va Pensiya jamg‘armasiga muddatidan oldin pensiya tayinlash bo‘yicha taqdimnoma yuboriladi.
Shuningdek, ushbu toifadagi fuqarolarga qo‘shimcha moddiy kafolatlar ham ko‘zda tutilgan. Mehnat shartnomasi bekor qilingan shaxslar 30 kalendar kun ichida portal orqali murojaat qilib, avvalgi ish joyidan uchinchi oy uchun ham o‘rtacha oylik ish haqini olish huquqini beruvchi ma’lumotnomani bepul qo‘lga kiritishlari mumkin.
