“Ilgari Tashiyevni ko‘rgandim, lekin rejani o‘zgartirdim”. Sadir Japarov 2027-yilgi prezidentlik saylovida qatnashishini e’lon qildi
Davlat rahbari jurnalist Ali Toqtakunovga bergan intervyusida bo‘lajak saylovlar barcha siyosiy kuchlar uchun ochiq, shaffof va adolatli o‘tishini, ma’muriy resurslardan foydalanish kabi eski usullarga chek qo‘yilishini va’da qildi.
“Men yana bir muddatga o‘z nomzodimni qo‘yish va ishni davom ettirish niyatidaman. Saylovda yana kim qatnashishni istasa – marhamat, o‘z nomzodini qo‘ysin. Biz hech kimni cheklamaymiz”, dedi Sadir Japarov.
Suhbat davomida Qirg‘iziston yetakchisi ilgari qayta saylanish niyati bo‘lmagani hamda mamlakatning bo‘lajak rahbari sifatida sobiq MXDQ rahbari Qamchibek Tashiyevni ko‘rganini ochiq tan oldi. Biroq keyinchalik islohotlar uzviyligini ta’minlash maqsadida o‘z rejalarini qayta ko‘rib chiqqanini ta’kidladi.
“Yo‘l hamma uchun ochiq. Kim bormoqchi bo‘lsa – borsin. Biz hech kimni cheklamaymiz. Hammasi qat’iy qonun doirasida bo‘ladi. Saylovlar shaffof o‘tadi, raqobatchilar uchun hech qanday to‘siqlar bo‘lmaydi”, deya qo‘shimcha qildi u.
Ma’lumot uchun, Qirg‘iziston Konstitutsiyaviy sudi yangi bosh qomusga muvofiq Japarovning hozirgi vakolat davrini birinchi muddat deb topgan va uning 2027-yildagi saylovda qatnashish huquqini tasdiqlagan. 2021-yilgi muddatidan ilgari saylovda 79,2 foiz ovoz bilan g‘alaba qozongan Sadir Japarov uchun navbatdagi poyga 2027-yil 27-yanvarga belgilangan.
