Husanov “Siti”da haftasiga 125 ming funtgacha maosh oladi. O‘zbekistonlik himoyachining shartnomasi oshkor qilindi
Capology portali bergan ma'lumotlarga ko‘ra, 22 yoshli O‘zbekistonlik himoyachining kafolatlangan yillik maoshi 5,2 million funt sterlingni (haftasiga 100 ming funt) tashkil etadi. Besh yillik kelishuvning umumiy kafolatlangan summasi 26 million funtga teng.
Shartnomada natijalarga bog‘liq qo‘shimcha bonuslar ham ko‘zda tutilgan bo‘lib, ular evaziga futbolchi haftasiga yana 25 ming funt (yillik 1,3 million funt) ishlab olishi mumkin. Maksimal bonuslar bilan uning yillik daromadi 6,5 million funtgacha yetadi.
Taqqoslash uchun, “Manchester Siti”da eng yuqori maoshni Erling Holand oladi – haftasiga 525 ming funt. Kuchli beshlikdan Jek Grilish (300 bin funt), Omar Marmush (295 ming funt), Fil Foden (280 ming funt) va Janluiji Donnarumma (265 ming funt) joy olgan.
